தழையுணர்த்தும் சிறுவாழ்வு

உலுக்கி உலுக்கி ஆட்டியபோதும்
முருங்கைக்கிளை 

சிரித்துக்கொண்டு நிமிர்ந்துவிடுகிறது

பெருமழைசொரிந்த
நேற்றைய சலிப்பெங்கே என்றால்
நம் காலடியில் உதிர்ந்து பறக்கும்
இலைகளைச் சுட்டியபடி
ஓராயிரமாய்க் கிழிந்து தொங்கும் 

வாழையிலையை வருடப்போகிறது

ஏறியிறங்கும் அணிலுக்கும் 

ஒண்டு இடுக்கில் நார் சேர்க்கும் காக்கைக்கும் 

ஆட்சேபமின்றி இடம்

மழையைக்குடிக்கும்
ஒளியைத்தின்னும்
இளவெயிலில் தழையுணர்த்தும்
சிறுவாழ்வு

சொல்லிக்கொள்கிறோம்
எதற்கும் இடந்தரா எம்முடையதைப் 

பெருவாழ்வென்று